top of page
  • Writer's pictureMohamed Ahmed

آخر تحديثات يوتيوب.. تغيير الإدارة و اقتحام عالم ال Podcasts


الفترة اللي فاتت يوتيوب مر بمجموعة من التغييرات.. سواء على الصعيد الداخلي.. من حيث الإدارة أو خارجياً من حيث التحديثات الخاصة بالموقع


للي ميعرفش فرأس السلطة في يوتيوب انتقلت من susan wojcicki سوزان وجيتسكي إلى Neal Mohan نيل موهان.. وكل المحللين شايفين إن مهمة نيل هتكون أسهل من مهمة سوزان.. لأنه بحد وصفهم شايفين إن التركة اللي استلمها غير مثقلة بالمشاكل و التحديات.. و لكن هل دة فعلاً حقيقي؟ هل حجم التحديات في ظل منافسة تيك توك الشرسة هيكون أقل ولا أكتر؟


كل الأسئلة دي انعكست على بعض التحديثات اللي طرأت على يوتيوب مؤخراً.. أولها إنه يوتيوب رسمياً بدأ يعترف بال podcasts.. كانت موجودة و من زمان و تواجدها على يوتيوب مش جديد.. لكن دلوقتي تقدر ترفع على Youtube music محتواك بصوت بس.. مش لازم تكون مصوره فيديو.. و دة بيدخل في دايرة التنافس مع منصات ال podcasts زي spotify و deezer و google podcasts و apple podcasts.


و بالإضافة لدة فتقدر تعمل playlist تحت عنوان podcast.. و الاعتراف دة هيزيد من اهتمام ال algorithms بتاعت يوتيوب لل podcast.


بس السؤال.. هل لو أنا ببدأ podcast جديد و رفعت الحلقات على قناتي اللي عليها بالفعل جمهور.. هل دة ممكن يأثر على ال reach الخاص بالقناة؟


الإجابة.. في الغالب آه.. لأن خورزميات يوتيوب قائمة على عرض المحتوى المتناسب مع اهتمامات الشخص.. فلو الشخص متعود منك على محتوى مدته قصيرة نسبياً و فجأة لقى فيديوهات مدتها ساعة بتنزل على قناتك فهيحصله خلل لفترة مش قصيرة تماماً و دة هيأثر على وصول فيديوهاتك التانية.


الميزة في الموضوع ال podcast واللي كتير من المسوقين على مستوى العالم شايفينها إنها هتبدأ تتيح مساحة للإعلانات الصوتية على ال podcasts زي المنصات المنافسة


و زي ما يوتيوب بيحاول يزاحم المنصات المختصة في المحتوى الصوتي.. فكمان بيحاول يزاحم منصة تيك توك في جزء الفيديوهات القصيرة.. أو ال Shorts.. واللي كان سبب في إنهم يعملوا بعض التطوير في جزء Youtube shorts.. فعلى سبيل المثال دلوقتي تقدر ترد على التعليقات بفيديو.. و تقدر تاخد فيديو شخص تاني و تعلق عليه.. كمان تقدر إنك تختار على تطبيق يوتيوب على ال mobile صورة ال Thumbnail الخاصة بالفيديو.. أو تقدر تقول الصورة الخارجية للفيديو.. كل دة.. وانت جوة ال application.


دة فيما يخص الفيديوهات القصيرة.. بس كمان دلوقتي جوة التطبيق أو الموقع على الكمبيوتر.. تقدر تغير الخلفية الموجودة وراك في الفيديو بدون ما تحتاج لكروما أو قماشة خضرة أو زرقا.. باستخدام ال artificial intelligence.. ودة هيسهل على كتير من المستخدمين من اللي معندهمش الخبرا الكافية في تقنيات التصوير و إضاءة الكروما و تجنباً لمشاكلها.


نقطة كمان يوتيوب شغالة عليها وقريب جداً هتنتشر وهي إمكانية وجود أكتر من صوت بأختر من لغة لنفس الفيديو.. وهو الأسلوب المتبع في منصات البث زي netflix و غيرها.. و دة هيتيحلك إنك على نفس القناة ترفع فيديو واحد و ترفع أكتر من ملف صوت دوبلاج للفيديو.. بدل ما ترفع أكتر من فيديو بأكتر من لغة.. و دي كانت مشكلة كتير من الصناع كانوا بيعانوا منها.. بالذات في جزء المشاهدات اللي عددها بيتفرق بين الفيديوهات أو القنوات.


نقطة أخيرة وهي تعتبر نصيحة من يوتيوب للمستخدمين و صانعي المحتوى اللي عندهم أكتر من 500 مشترك على قناتهم وهي إنهم يهتموا بال community feed وهي مساحة أقرب إلى مواقع التواصل الاجتماعي التانية تقدر تنزل فيها posts تتكلم فيها مع جمهورك.. تاخد رأيهم في الحلقة.. تعملهم تصويت على أفضل ميعاد لنزول الحلقة.. ونصيحتهم إن كل الانشطة دي هتزود من وصول المحتوى الخاص بيك للناس.. مش بس للمشتركين في قناتك.


ودة باختصار كان ملخص آخر تحديثات يوتيوب.. لو مهتم بكل ما يخص التسويق و الإعلانات تقدر تتابعنا عشان تعرف كل جديد.. ولو استفدت تقدر تشارك دة مع أصحابك المهتمين.

6 views0 comments

Comments


bottom of page