عزيزي الطبيب.. لو مهتم بالتسويق و زيادة عملائك و إدارة حساباتك على ال social media و الموقع الخاص بيك أو بالمستشفى بتاعتك يبقى لازم تتابعنا الفترة الجاية.. و اللي على مدار حلقات هنعرف فيه مع بعض الإجابات على أسئلة كتير من أول إزاي تكون البداية التسويقية الصح لحد إدارة ال brand بتاعك.
عزيزي الطبيب..
تزبيط الشغل أهم من الشغل.. و إنك تكون محدد أهدافك التسويقية من البداية دة بيسهل عليك وعلى اللي شغالين معاك.. أصل تخيل كدة يدخلك مريض مش عارف هو بيشتكي من إيه ولا عاوز حتى يقولك و في الآخر يعترض و يقولك "إنت ماعالجتينيش!" شعور مزعج.. مش كدة.. أهو نفس الموضوع بقى في التسويق
طيب إيه هي أهدافي التسويقية اللي محتاج أحددها؟
في حالة التسويق الطبي فأهدافك مش هتخرج عن الآتي
1- مرضى أكتر يجولك
2- عائد أكبر
3- تكبر اسمك و تتعرف أكتر
4- أو أسباب آخرى
هتقولي الأسباب الأخرى دي ممكن تكون زي إيه.. هقولك دي أسباب شخصية و إحنا بنحترم المساحة الشخصية لكل دكتور.
عزيزي الطبيب.. مش كل الطرق تؤدي إلى روما
اتكلمنا من شوية عن ضرورة إنك تكون محدد أهدافك التسويقية من البداية
و وضحنا إيه هي الأهداف المختلفة اللي ممكن تكون عند كل طبيب
والسؤال كان.. هل كل الأهداف ليها نفس الطريقة؟
أكيد الإجابة لأ.. و على قد ما تبدو إجابة زي دي بديهية على قد ما ممكن تكون مش واضحة للبعض
فتلاقي دكتور لسة بياخد الخطوات التسويقية الأولى ليه باعتلك page لدكتور ليه اسم كبير و بيظهر في القنوات و محقق شعبية و سمعة ضخمة و يقولك هو إحنا ليه مش بنعمل زيه؟!
و هنا المسوق بيصعب عليه نفسه و بيدخل يعيط لوحده في الحمام و يرجع يرد على الدكتور دة.
ما علينا.. نرجع لموضوعنا
الخطوة التانية بعد ما تحدد أهدافك التسويقية هو إنك تدرك واقعك بشكل دقيق.. تدرك إنت فين و مين حوليك و إيه مواضع التميز لكل واحد فيهم.. و بمجرد ما تدرك دة.. و تقارنه بأهدافك و تخليهم الاتنين على أرض واحدة.. بنقدر إننا ندخل على المرحلة اللي بعدها و هي مرحلة
"إنت مش عارف إنت بتكلم مين؟"
إنك تعرف انت بتكلم مين كطبيب دي حاجة مهمة جداً.. لأن دة بينعكس على اختيارك للأسلوب المناسب مع اللي بتكلمه و دة اللي بيتم استخدامه في التسويق تحت مسمى "الجمهور المستهدف" و الخواجة بيسميه ال targeted audience
طب ليه ضروري تعرف جمهورك؟ لأن الحاج محمد غير مدام ساندي
الحاج هتكلمه كدة: "بص يا حاج.. إحنا بس هنعمل شوية تحاليل و إشاعات عشان نتطمن عليك و بعد كدة لو كويس يا حاجة معلش بقى هنجوزه و أبقي خدي الكشف و إنتي خارجة" في ظل تنهيدة من الحاجة مصحوبة بطبطبة على كتف الحاج و "يابني هو بس يقوملنا بالسلامة و عروسته موجودة"
أما بقى مدام ساندي
"Don't worry at all, we are just gonna make some analysis so we can check the problems with the hemoglobin deficiency in your blood..الكشف هيزيد 500 جنيه أبقي سيبيهم برة مع السكرتيرة”
بصرف النظر يعني إن صعب يبقى المرضى اللي عندك هم الاتنين دول بس يعني كننا نقصد نوضح المثال و هنا دة برضه مجرد مثال لغوي بسيط لتوضيح الفرق لكن الموضوع أكبر من كدة.. إدراكك لجمهورك بيخليك قادر تفهم أكتر احتياجاتهم و الأسلوب الأمثل للتواصل معاهم.
عزيزي الطبيب
بعد ما بتعرف جمهورك و بتعرف تتعامل معاه إزاي نيجي بقى للنقطة المهمة
و هنا نقتبس كوبليه للجميل محمد فوزي رحمة الله عليه
إزاي و إمتى و فين صادفني حبك؟!
أو تسويقياً إزاي و إمتى و فين أوصلك يا عميل
و القصد هنا هو كيفية اختيار القناة أو المنصة المناسبة اللي عميلك موجود عليها
مثال تبسيطي أرجو ألا يكون اختزال مخل
مثلاً لو انت طبيب تجميل ففي الغالب هيكون النسبة الأكثر من جمهورك سيدات و هيكونوا موجودين أكتر على instagram.. و بيفضلوا الفيديوهات أكتر من الصور
على عكس لو جمهورك من الرجال و بيفضلوا فيسبوك.. أو إن مجالك معقد فمحتاج فيديوهات شرح مطولة فوقتها Youtube هيكون القناة الأمثل للوصول لجمهورك.
و مش شرط إن قناة أو وسيلة واحدة تكون هي الوحيدة المناسبة للوصول لجمهورك.. على سبيل المثال فتقدر توصل لجمهورك من خلال إنستاجرام و تيكتوك أو من خلال يوتيوب و موقع إلكتروني
فهمك للكلام دة هيسهلك طريقك و هيوفر عليك خطوات كتيرة ممكن تضيع ما بين شركات أو وكالات أو حتى فريق خاص بيك عمره ما هيقدر يديلك النتيجة المطلوبة لأنك إنت نفسك مش عارفها.
"هتدفع و أوصلك الإعلان للكل بما يرضي الله؟ ولا هتعتمد على ال organic و أوقعلك ال reach بما لا يرضي الله؟"
عبد الله مشرف من فيلم عسل أسود.. بتصرف
الوضع زمان في السوشيال ميديا كان مختلف بشكل كبير عن دلوقتي
زمان كان المسؤولين عن المنصات دي لسة بيستكشفوا الدنيا هتروح بيهم لفين
و كان ساعتها ال reach لسة بخيره.. وعدد الناس مكانش كبير
كان اللي بيبقى عنده 500 friend كان بيبقى شخصية عامة
و في ناس زي أغنياء الانفتاح كدة استغلوا دة لمصلحة ال business بتاعهم
و حققوا مقابل ضخم جداً
مارك زوكربرج يسكت؟
صاحب فيسبوك و رفاقه قالولك فيها لاخفيها
هتعمل فلوس من ورايا يبقى هقللك ال reach ولو عاوزه يزيد تدفع..
"شخلل جيبك يا بلدينا عشان تعدي"
و من ساعتها و بعد ما كان البوست بينتشر ببركة اللون الأزرق بقى ضروري ولا بد ولا محالة إنك تدفع sponsored ads عشان ت boost ال post أو تعزز وصوله للناس
و بالتالي مهما كان ال content اللي هتنزله كطبيب عندك قيم و جذاب.. هيكون محتاج فلوس أو بلغة السوق "محتاج زقة" و مفيش حد كبير على دة.. أكبر الشركات في العالم لما بتعمل إعلان أو محتوى بتعمله sponsorship
و توضيحاً.. الفلوس دي مش بتتدفع للشركة أو للشخص اللي بيعملك الإعلان.. دي بتتدفع للمنصة نفسها.. سواء فيسبوك أو إنستاجرام
و أخيراً.. رسالة للدكتور اللي بعت إنه عاوز يعمل حملة على "الفيس" و مش عاوز يدفع أكتر من 200 جنيه.. أحب اطمنك إن التليفون مش بيكون busy طول الوقت.. دة block
عزيزي الطبيب
من الحكم الشعبية العميقة واللي طالما تورثتها الجدات و من بعدهم الأمهات و الزوجات هي حكمة
"الزن على الودان أمر من السحر"
و في رواية أخرى.. "التكرار يعلم الشطار"
و في مجال الطب فحضرتك كطبيب بتدي المريض الدوا يكرروا عدد معين من الأيام في ساعات محددة بحيث إنه في نهاية العلاج يكون تحقق الهدف المطلوب وهنا هو الشفاء بإذن الله.
نفس الموضوع بقى في خوارزميات ال social media
وهي الآلية المسؤولة عن توصيل محتواك للمتلقي بتاعك
و طريقة عملها هي تكاد تكون مماثلة لطريقة عمل الدواء
فلو عندك حملة تسويقية ليها محتوى.. يستحسن جداً إنك تثبت مجموعة من الأيام في ساعات محددة.. و دة هيساعدك على زيادة وصول محتواك لأكبر قدر من جمهورك.
