top of page
  • Writer's pictureMohamed Ahmed

Deep Search من مايكروسوفت بنج: طب ولو جيت و جبتهولك؟




محركات البحث وطريقة عملها

بشكل عام وعلى مدار العقود الأخيرة و اللي كانت محركات البحث أو ال Search Engines موجودة فيها.. كان دايماً في حاجز بين طبيعة الأسئلة اللي بيطلبها المستخدمين و الإجابات المتاحة بالفعل.. وحتى محرك بحث زي Google بدأ يطلق فكرة "هل تقصد……..؟" في محاولة منه إنه يقرب السؤال اللي أنت بتطرحه عليه.

كلنا تقريباً بلا استثناء ولو لمرة واحدة مرينا بلحظات بنحاول نطرح فيها أسئلة على محرك بحث زي جوجل و غيره و لكن مكناش بنقدر نوصله بضبط اللي نقصده.. عشان كدة حابين نتكلم النهاردة عن الميزة الجديدة من Microsoft Bing وهي Bing Deep Search واللي هتخلي عملية البحث عن المواضيع المعقدة أسهل وأكثر فائدة.. في إعلاء لشعار الأم المصرية.. طب ولو جيت و جبتهولك؟

 

ما هو ال Deep Search من مايكروسوفت؟

Deep Search باختصار بيعتمد على الدمج بين كل المعلومات الموجودة على محرك البحث Bing، وبيدمجهم مع GPT-4.. واللي أعتقد إنه اصبح غني عن التعريف.. وهنا هنحتاج نفهم تفصيلة بسيطة عن طبيعة عمل محركات البحث.

محركات البحث في النهاية بتتعامل زيك كدة لما تدخل امتحان و تبقى حافظ مش فاهم.. هتلاقي الكلمة الفلانية تقوم كاتب Chapter 1 كله.. دة اللي عندي و زيادة و نقي انت اللي يعجبك.. مع العلم إن طبيعة السؤال نفسها ممكن تكون مختلفة و مش معنى إن الكلمة دي موجودة فالإجابة المطلوبة هي اللي في Chapter 1.. دة بضبط اسلوب محركات البحث وهو ال Key Words.

 

مزايا جديدة من مايكروسوفت بينج

الجديد و التوجه اللي شكلنا كدة مكملين فيه الفترة الجابة إن Bing عاوزة محرك البحث بتاعها يفهم السؤال.. وبالتالي يقدر يديلك بضبط اللي أنت محتاجه.. كأنه واحد صاحبك

على سبيل المثال لو طرحت سؤال عن الحد الأقصى لاستخدام البطاقة الائتمانية بتاعتك على Amazon Japan.. فمحرك البحث هيقولك بعض الإجابات أولهم الإجابة المباشرة لسؤالك و بعض الاقتراحات اللي فيها ال Key words اللي أنت كاتبها.

لكن تخيل لو قولت لصاحبك كدة و أنتوا على القهوة يشوفلك الفيزا بتاعتك ممكن تستخدمها لحد كام؟ هيقولك بص يا سيدي.. هو مؤقع البنك بيقول كزا.. وبيقولك كمان أنت ممكن تزود الحد بتاعك إزاي.. وبعدها يدخل على موقع تاني و يقولك.. في ناس بقى بتقولك حل للمشكلة دي وهي كذا و كذا و كذا.

 

تاثير مايكروسوفت بينج الجديد على التكنولوجيات القادمة

نقدر نقول كدة إنه بيحاول يفهم المعنى المقصود من سؤالك و بالتالي يفصلك الإجابة المخصصة ليك.. ولا تستبعد بعد كام شهر أو حتى كام سنة إنه يبدأ يفصل إجابته بناءً على أنشطتك التانية على الإنترنت.. زي إنك مثلاً تدخل وتشوف جهاز ال Xbox بكام.. وبعدها تبدأ تشوف أحسن وسائل للدفع.. وبعدها تدخل تسأل Bing Deep Search على أفضل طرق الدفع برا مصر.. فتلاقيه بيربطهالك بالموضوع اللي هو عارف إنه شاغل دماغك الفترة دي.. طبعاً دة لسة مش شيء مطروح و لكن الشاهد من الكلام إن الإجابات من خلال Bing Deep Search هتكون أكثر عمقاً و "مشخصنة" أو متفصلة على مقاسك.. ودة عن طريق انه بيستخدم تقنيات متقدمة لتحليل النتايج و تصنيفها و تجميعها بناء على الموضوعات المرتبطة بسؤال.

 

الاسئلة المعقدة هو أساس ال Deep Search من Microsoft Bing

Deep Search مش شرط يكون مناسب لكل سؤال أو لكل مستخدم.. ولكنه مصمم للناس اللي عندها أسئلة معقدة بتتطلب أكثر من إجابة بسيطة.. و Bing هيتيح ليك كل الاختيارات.. إنا إنك تعمل بحث عادي أو إنك تدخل على Go Deeper.

في النهاية Bing Deep Search هي حلقة من سلسلة التطور شبه اليومي للذكاء الاصطناعي واللي من كتر ما رفع سقف التوقعات أصبح الانبهار عندنا صعب يتحقق.. قولولنا رأيكم في الخطوة الجديدة من Bing.. هنستنى رأيكم في ال Comments 


تابعونا عشان يوصلكم كل جديد

5 views0 comments

Comments


bottom of page