معدل تسارع الأحداث في آخر كام سنة و بالذات في مجال التسويق و تأثره بالجانب التكنولوجي أصبح عالي جداً.. والتطور بين شهر و التاني أصبح من السهل إن أي حد حتى لو غير مختص ينتبه ليه.. والنهاردة هتكون محاولة مننا إننا نعرف.. 2024 وخدانا على فين؟
استمرار موجة الذكاء الاصطناعي:
على مدار الفترة الجاية فمن المتوقع إن الذكاء الاصطناعي يلعب دور أكبر من اللي لعبه على مدار السنة اللي فاتت سواء في كتابة المحتوى أو في التصميمات البصرية.. وبالأخص في جزء الإعلانات أو Media Buying ومن المتوقع إنه يساعد في تحسين جودة الاستهداف Targeting والوصول لمعلومات و تفاصيل أكتر تخص العملاء المحتملين.
ال VSO أو Voice search optimization أو تعزيز البحث الصوتي:
لو جينا نبص بشكل عام فهنلاقي إن الاتجاه كل يوم في كل المجالات المعتمدة على التكنولوجيا و بالتالي في التسويق ماشي ناحية تسهيل الأمور ودة شيء لا يخفى على حد.. الفترة الجاية هيكون التركيز على تعزيز البحث عن طريق الصوت أو Voice search و اللي بدأنا نلمسه في آخر شهور 2023.. على سبيل المثال البحث بالدندنة أو ال Humming Search في Youtube واللي اتكلمنا عنه بقدر من التفصيل في أكتوبر اللي فات
المتوقع إن الفترة الجاية يبدأ ال VSO يسحب البساط بالتدريج من ال SEO وآلية دة هتضح أكتر قدام.. لكن باختصار المسوقين هيحتاجوا يتأقلموا إزاي محتواهم يظهر كمان بالبحث الصوتي زي ما هو بيظهر كلامياً.. والجزء دة بالذات الكلام فيه كتير و الأفكار المختلفة فيه أكتر.. وأكيد هنفردله مساحة على مدار الشهور الجاية.
الميتافيرس Meta Verse:
المتوقع إن الفترة الجاية يبدأ ال Meta Verse يظهر على الساحة وبالتأكيد أول الفاتحين للمجال دة هيكون المعلنين.. شكل الأفكار مبهر جداً.. وبالذات مع انتشار نظارات الواقع المعزز اللي البعض بيعتبرها بداية النهاية لعالم ال Smartphones.
Social commerce and in-feed shopping:
على مدار سنين كتيرة كننا بنسمع عن ال E-commerce و قعد المصطلح دة يتوسع كل يوم.. خلال الفترة الجاية بقى هنبدأ نسمع أكتر عن مصطلحات زي ال Social commerce and in-feed shopping وفكرتها باختصار إنه بدل ما أنا بدخل أشوف إعلان عن المنتج من خلال إحدى تطبيقات التواصل الاجتماعي وبعدها أدخل على موقع و اشتري فالاتجاه هيكون إنك تشتري من الإعلان نفسه اللي أنت شوفته وليكن على Facebook أو Tiktok أو Youtube أو غيره.. طبعاً الموضوع لسة بيواجه تحديات زي بناء الثقة مع المنصات دي في وسائل الدفع و غيره.. ولكن في الأغلب فدة هيكون هو الاتجاه في الفترة الجاية.
"شخصنة" تجربة العميل أو Personalization and customer experience:
دة منقدرش نعتبره اتجاه جديد و نقدر نقول إننا بدأنا نجني ثماره بالفعل.. ولكن نقدر نقول إن دة مكمل معانا من السنين اللي فاتت.. ومن المتوقع إن الذكاء الاصطناعي يلعب فيه دور أكبر خلال الفترة الجاية.
التسويق بالفيديو أو ال Video marketing:
ودة برضه من الحاجات اللي نقدر نعتبرها مكملة معانا من السنين اللي فاتت و هيكون ليها نفس التألق والقوة اللي كانت عليهم على مدار الفترة اللي فاتت.